الأفق المغربي موقع ووردبريس عربي آخر
مقالات مشابهة
اعداد حسن بوسرحان.
قصيدة للزجال خالد فولان
ولد باب الله
ما عنديش
وما خاصنيش
شافوني ضاحك
لاعب
قالو لاباس عليه
يلعب بالفلوس
وريشو منفوخ
وراني غير ولد
باب الله
وعالم بي غير
الله
واقفين تمشي وتجي
فينا الروح
وراني غير بسري
ما باغيش نبوح
ونولي قدام العادي
والبادي مفضوح
ما تعاتبوني و لا تحاسبوني
الا سمعتو مني شي كلام
راه اللي في قلبي على لساني
والهم شيبني وكواني
انا غير هداوي
غير كننطق ونداوي
حتى حاجة في الدنيا
ما ليها قيمة ولا ساوية
بفعايلنا مشينا اللهاوية
وشي ناس جامعة طاوية
وكل حاجة بحساب
واخدين الدنيا متاوية
ولد باب الله
والا ما عجبكم حالي
راني غير بوهالي
ناعس بنهار وسهران
الليالي
وراني براسي ما عارف
اشنو واقع؟
واشنو طرى لي ؟
ولد باب الله
لقيت راسي عايش
عيش لا تموت
وماشي عايش كيف
بغيت
وا زهري معامن عايش؟
وفين تليت؟
ماخدمت عقل وتما بقيت
حيت أنا اللي ما فهمت
ولا سمعت لكلام وقريت
جريت وجاريت
وحتى غرض ما قضيت
ولد باب الله
عفريت وفي ايدي حبل
و تبعوني حتى ملي تبعت
الغناء والطبل
وما لقيت لراسي حل
شوية بشوية بديت نهبل
وما بقى عندي عقل
وكلشي غير يطل
يخلف الخطوة ويتسل
ولد باب الله
بقيت مقابل دوك المسامر
لقيت القلب خاوي والراس
عامر
سخنو لي المجامر
زادو لي فيه وخلاوني
مغامر
وشي ناس علي تتغامز
وتتامر
وانا من تكليختي
ما كاين غير حاضر
وأمر
ولد باب الله
وفين مشات بي السفينة؟
وحياتي ولات روينة
مشات ميمتي الحنينة
وشحال صبرات على قبلي
مسكينة
عارفاني في طبعي انسان
وا مكواني يا مكواني
بلا بيها شحال بقيت نعاني
وكلشي تخلى علي ونساني
بويا علي فضلو كبير
ضرب علي السروية
كبرني ورباني
كلمات … خالد فولان.
