الأفق المغربي موقع ووردبريس عربي آخر
مقالات مشابهة
اعداد حسن ابو أنس.
بقلم الزجالة فاطمة خير ..
براڤو براڤو براڤو
عليكم يا السبوعة
يا سياد الرجالة
هتكتوا شباك اروبا
صيفطوها هجالة
لا نفقة لا مأخر صداق
زعزعتوا فرق
كانت عليها عوالة
الثور وزيعة وزعناه
والذيب عوگ على خلاه
والفروج وخا زگلناه
مازال نريشوا باباه
في ليام التوالى
عيتوا تزوقوا ف الخرافة
ها فلان وها فرتلان
كلشي طلع عيّان
واليوم تعرات عورتكم
وليتوا مهزلة
في قطر ما تسمع غير الزئير
هذو وليدات المغرب
اصل مأصل، نسل لحرار
الإرادة قوية والمقاتلة
فيق وتوکض يا الغافل
هذا عرين اسود المغرب
ماشي من ولا
الاسلام……. والرضى
البطولة…. والشهامة
ماشي غير جي
وگول حنا رجالة
الله يرضي عليكم
يا ولاد الحلال
رفعتوا راس العرب
شعوب وحكام
خليتوا عقول العالم
حايرة فهذ المسألة
وزعتوا…. موووووو
و بكّيتو…. عووووووو
شليتوهم بحال
النخالة
وهلا هلا هلا هلا
الرگراگي ووليداتُ
سبوعة رجالة
وهلا هلا هلا هلا
صدمتوا العالم
خليتوا حالتهم حالة.
و هذي ما شافوهاش
وهذي ما عرفوهاش
وهذي، مافهموهاش
ولا عمرهم يفهموها
كيفاش خلقتو البلبلة
باركة غير نصف النهاية
آجيو سطاسيونيو حدايا
