الأفق المغربي موقع ووردبريس عربي آخر
مقالات مشابهة
إعداد حسن بوسرحان…
بقلم الشاعر: احمد الگرش
دخلت لسوق لمعاني والحكمة
نقلب ونهبش على قوافي وحروف
نصنع منها قصيدة شان وهمة
لقيت غمامة حجبات علي الشوف
تشتات حروفي وهربات علي الكلمة
مابقيت تفرز النعجة من لخروف
واحد شوية صفا الحال ومشات لغمامة
تحلو عيني ومشا الخوف
بأن لي سوق لمعاني عامر بالعوامة
عوامة لقوافي ولحروف
جمعت شوية ونويت نصنع كلمة
لقيت حرف ما يشبه لخوه بحال الصروف
من هنا عرفت الفرق بين الفتحة والضمة
كلها وحالو شي من لحرير وشي من الصوف
الناس طوب وحجر من لوجه تبان العلامة
وجه الخير باين ووجه الشر من شكلو معروف
القلب لبيض يفتح ليك بيبان الخير والكرامة
والقلب لكحل يرد عليك الدفوف
علاش الدنيا هاكا مظلامة
شي قلبو بيض وشي قلبو بالشر ملفوف
امتا نفيقوا ونحسوا بالندامة
ونبعدوا على الشرونزرعوا الخير والمعروف
شحال قدك تعيش بالشر طلب السلامة
راه الدنيا فانية حل عينك وشوف
تقا الله حنا في هاد الدنيا غير ضيوف
لجم فمك ودير ليه كمامة
وبعد على النميمة ترجع ليك بالندامة
تعمى ليك لبصيرة وتولي مكفوف
باركا من النفاق ياللي حسبتيه شهامة
ورجع لمولاك حارب الشر بالسيوف
هدي هي الدنيا شي محزم بلفهامة
وشي راسو عامر بجلوف
شي دار محساب يوم القيامة
وشي غافل وعلى الدنيا ملهوف
