الأفق المغربي موقع ووردبريس عربي آخر
مقالات مشابهة
اعداد حسن بوسرحان..
بقلم الزجال : مولاي الحسن العطاري الإدريسي
شي ناس توحشتهم
وشي ناس كرهت نهار عرفتهم
وشي ناس مابغيتش نعرفهم
شي ناس يصعاب فراقهم
وشي ناس يريحك بعادهم
وشي ناس كاعما على بالهم
شي ناس يتحطو على الجرح يبرأ
وشي ناس دايرين بحال الجمرة
وشي ناس حرقتهم تالم وما تبرا
شي ناس غا داوين
شي ناس والو ما فاهمين
وشي ناس بحال الي ما كاينين
شي ناس معانا كانو
شي ناس مشاو ما تلاو بانو
وشي ناس الملح والطعام خانو
شي ناس ما فهمنا معاهم والو
شي بقا فصباغتو وشي تغير حالو
وشي عايش وعاجبو هبالو
شي ناس ضاربين الدنيا بركلة
شي وحدين حاصلين حصلة
وشي وحدين ما يسواو بصلة
شي ناس الابهة والاناقة
وشي ناس دايزة فيهم الصدقة
وشي وحدين خصهم الفلقة
شي ناس مدورين الحركة
شي ناس ما لقاوش حتى براكة
وشي ناس مشات معاهم البركة
شي ناس تبغيهم حداك
شي ناس ملي تحتاجك تلقاك
شي ناس ملي تدور تعطيك على قفاك
شي ناس لا دين لا ملة
وشي ناس تحضر فوقت الغلة
وناس فوقت الحزة تضربها بسلة
شي ناس تعول عليهم
وشي ناس ماشي بيديهم
وناس نهار تحتاجهم ماتلاقيهم
شي ناش نعم الرجولة
شي ناس عقول الطفولة
وشي ناس فامهم ديما محلولة
شي ناس ماتنفع ماتضر
شي ناس ما تعرف غير تعكر
شي ناس زايدة فالظلم والمنكر
شي ناس فات فيهم الفوت
شي ناش يقلبو على القوت
وشي ناس يتسناو الموت
شي ناس يديرو الخير
شي ناس يقلبو على التغيير
وشي ناس عاطينها للنكير
شي ناس وشي ناس
شي ناس دارو لاباس
وشي ناس ما عندهم اساس
شي ناس عاجبها حالها
شي ناس شادا تيقارها
وشي ناس ما عرفت مالها
الناس حوال وحوال الناس شلا
لي واصلا ليه للعظم ولي باغي يتفلا
ولي مسموم وفسمو يتقلى
الله يهدينا بلا قياس
ويزرع لمحبة فقلوب الناس
ويزول الهم والوسواس
