الأفق المغربي موقع ووردبريس عربي آخر
مقالات مشابهة
إعداد حسن بوسرحان
الشاعر محمد حديش
♧زجل♧
♤ مَنْزْلَةْ الصْفا ♤
تْسَرْسَبْ شَلَّالْ مَنْزْلَةْ بْها الصْفا
مَنْ جوفْ الخاطَرْ يْرَيَّقْ الرُّوحْ
أَعاري عْليكْ يانَسْمَةْ فْجَرْ دْفا
تْنَدِّي مَنْ خابْيَةْ الْبالْ المَكْبوحْ
ؤُتَسْقي جْدورْ غْصانْ ديكْ الوَقْفا
بْنَضْرَة وْجودِيَة مَنْ زينْ يْفوحْ
أَعاري عْليكْ المْحَبَّة السَّاكْنَة خْفا
نَخْضي الذَّاتْ تَّا يْغيبْ الجْموحْ
مْوَحْشا كِالطِّيرْ الْحُرْ لَحْنْ الْوْفا
يْعَنَّڭْ فيها مْقامْ العَشْقْ المَمْنوحْ
أَعاري عْليكْ يا تيهْ الْحْفا
وَقْتاشْ تَدَّاوي ڭْدامْ المَجْروحْ
ؤُتَعْڭَبْ رِيَّةْ زْمانْ مَنْزلَةْ الصْفا
تْساوي كيسانْ المْحَبَّة مْدوحْ
أَعاري عْليكْ يا جْراح الْجْفا
تْخَيَّطْ شَرْڭاتْ تَنْواحْ المَشْبوحْ
تَزْدي تاويلْ شَهْقاتْ هيتْ اللَّهْفا
ؤُتْڭادْ الخْواطَرْ بْ شَلاَّ صْروحْ
أَعاري عْليكْ يا رْڭادْ الشَّحْفا
الدَّاڭا وْتادْ الڭْفا فْ بابْ الفْتوحْ
فَلْسَفْها أَفْلاطونْ رْسومْ فْ كَفَّا
تْلَحْفاتْ بِها دْيوتيما بَغْرامْ مَڭْروحْ
أَعاري عْليكْ يا شْميسَتْ الصَّدْفا
تْشَعِّي ديكْ الڭْلوبْ ضَيْ مَشْروحْ
ؤُتْرَجْعْ لِيَّامْ ناسْ نَخْوَةْ الشَّرْفا
صْحابْ العَزْ المْصِّفي شَهْدْ جْبوحْ
أَعاري عْليكْ يازْمانْ بَرَّمْ الدَّفَّا
كُلْها وْخايْمْتو رادْ كانونْ سْموحْ
تَلَّاتْ نْشيفْ صادْ الوْجوهْ بْخَلْفا
وَعْلى مَنْزْلَةْ الصْفا زَمَّمْنا الْبوحْ
إِمْكَنْ تَتْجَلَّى الشْجِيَة بَعْدْ الْغْفا
كْتابْ مَحْفوظْ حَكْمَة فْ اللُّوحْ
26\07\2023
